WANANCHI WA WILAYA YA NEWALA WAASWA KUJITOLEA KATIKA UJENZI WA MIRADI YA MAENDELEO

Mwenyekiti wa Halmashauri ya wilaya ya Newala Mheshimiwa Rashidi Ndembo na Mkurugenzi wa Halmashauri ya wilaya ya Newala Ndugu Marx Kamaoni wamewaasa wananchi wa wilaya ya Newala kujitolea kuchangia ujenzi wa miradi ya maendeleo inapoletwa katika vijiji vyao.

Mheshimiwa Ndembo na Mkurugenzi wa Halmashauri Ndugu Kamaoni waliyasema  hayo  wakati wa ziara ya Kamati ya Fedha, Utawala na Mipango ilipotembelea miradi ya wilaya ya Newala jana.

Kamati ya Fedha na Mipango ilipokuwa ikitembelea miradi ya halmashauri, miradi mingi ilionekana kutomalizika kutokana na fedha kutotosheleza kumalizia miradi hiyo. Hii imetokana na fedha inayotolewa na serikali  kutumika katika shughuli zote za ujenzi kuanzia usombaji maji, michanga na mawe, kazi ambayo ingeweza kufanywa na wananchi wa kijiji husika na fedha kutumika katika ununuzi wa vifaa vya viwandani kama mabati, mbao na simenti.

Mkurugenzi Mtendaji wa Halmashauri aliwaambia baadhi ya wanavijiji waliojitokeza wakati wa ukaguzi wa miradi hiyo kujitolea katika ujenzi wa miradi ya  maendeleo aliwaambia kuwa  serikali inapotoa fedha kwa ajili ya ujenzi wa miradi wananchi nao wanatakiwa kuchangia ili fedha inayotolewa na serikali iweze kununulia vifaa vya viwandani ili kuboresha miradi hiyo.

Mwenyekiti wa Halmashauri aliwaambia wananchi kuwa, kijiji chochote kitakachooneka kutoshiriki katika ujenzi wa miradi ya maendeleo basi miradi itahamishiwa kijiji kingine ambacho wananchi wake wako tayari kujitolea kushiriki ujenzi wa miradi ya maendeleo.

Miradi iliyotembelewa na Kamati ya Fedha, Utawala na Mipango ni Mradi wa ujenzi wa nyumba ya mtumishi na wodi ya Mkwedu, ujenzi wa nyumba ya mwalimu Chitenda, ujenzi wa nyumba ya mwalimu Mkoma II, ujenzi wa nyumba ya mwalimu Chilende, ujenzi wa nyumba ya mwalimu Mchemo, ujenzi wa nyumba ya mwalimu Mmulunga, ujenzi wa mradi wa maji Mmulunga na mashine ya kukamulia Alizeti Idamnole – Chihangu.

Mwenyekiti wa halmashauri na Mkurugenzi wa halmashauri waliambatana na madiwani wengine saba pamoja na wataalamu ambao wanaunda kamati ya Fedha, utawala na Mipango ya halmashauri.